٥ نصائح هتساعدك علي العمل من البيت بطريقة أفضل

العمل من البيت ليه مميزات عديدة زي المرونة و الراحة و توفير الوقت أللي بيضيع في الطريق ما بين البيت و الشغل. لكن في نفس الوقت بيمثل تحدي لتطبيقه و الحفاظ علي درجة عالية من الإنتاجية في يوم العمل. و مع ظهور فيروس كورونا المستجد و لجوء شركات كثيرة حول العالم و منهم أمان ليك لتطبيق العمل عن بعد للموظفين أللي ممكن ينفذوا شغلهم بدون التواجد في مقر العمل للحفاظ علي سلامتهم بنقدم 5 نصايح هتساعدك علي العمل من البيت بكفاءة

  • خصص مكان مناسب للعمل بالمنزل:

حاول تجهز جزء من منزالك أو غرفتك عشان يكون مكان لعملك و خليه منظم بشكل يناسبك و يشجعك علي العمل بتركيز و راحةو أتأكد ان فيه إضائة جيدة حواليك و في اللينك ده هتلاقي عدد من الأفكار اللي تساعدك علي تجهيز مكان عملك من المنزل

  • دخل نفسك في مود الشغل:

مش معني أنك بتشتغل من البيت أنك تبقي قاعد بتشتغل من السرير و لابس بيجامة لأن ده هيخليك في مود أنتخة و راحة و ده مش هيخليك تشتغل بكفاءة فمن الأفضل أنك تبدأ يومك كأنك نازل الشغل عادي و تمشي علي نفس الخطوات المعتادة زي ( الإستحمام , تغيير ملابس النوم , الإفطار , .....)و بكدة  بتكون دخلت نفسك في مود الشغل بجد

  • تحديد ساعات العمل:

مع المرونة المتاحة في العمل من المنزل ممكن تلاقي نفسك بتضيع وقت و مش ملتزم بساعات عمل محددة, و عشان تتجنب ده حاول تتفق مع فريق العمل علي مواعيد العمل اللي مش لازم تكون نفس مواعيد العمل العادية بس أتفقوا علي حد أدني من الساعات يكون كل الفريق بيشتغل فيها في نفس الوقت عشان التواصل و التعاون ما بينكم

  • التواصل المستمر بين الفريق:

خلي في تواصل مستمر علي مدار اليوم مع فريق العمل من خلال مكالمات محددة مثلا في أول و أخر اليوم لمراجعة أهداف اليوم و تطورات العمل و ممكن كمان تخليكوا في أونلاين كونفرنس مستمر في الخلفية خلال جزء من اليوم عشان تبقوا علي أتصال و تتعاونوا و تشجعوا بعض خلال اليوم و في اللينك ده هتلاقي أكتر من أبليكيشن بيساعدوا في تنظيم التواصل و العمل عن بعد

  • تقليل عوامل التشتيت :

خلال يوم العمل العادي في الشركة بيبقي في عوامل بتخليك تفقد التركيز زي الموبايل , وسائل التواصل الإجتماعي , إلخ.. , و أنت في البيت عوامل التشتيت ممكن بتكون أقوي لو مقدرتش تحدها عن طريق:

  • خلي موبايلك بعيد أو مقفول عليه و خلي يرن بس لو في مكالمات أو إيميلات و خلي إشعارات و سائل التواصل الإجتماعي صامتة
  • حط سمعاتك و شغل موسيقي لو ده بيساعدك علي التركيز عشان تفصل نفسك عن أي ضوضاء ممكن تحصل حوليك و تخرجك عن تركيزك
  • تجنب الزيارات المتكررة للمطبخ و حدد ميعاد الوجبات و خلي أكلك ميكونش في نفس مكان شغلك من المنزل

خليك في أمان في بيتك لو ظروف عملك بتسمحلك أنك تشتغل من البيت و في نفس الوقت حافظ علي كفاءة أدائك لعملك و أنت بتشتغل من المنزل. حاول تطبق اللأفكار ديه و قولينا لو ساعدتك و شاركنا بأي أفكار أخري بتستخدمها و انت بتشتغل من البيت.

٥ نصائح هتساعدك علي العمل من البيت بطريقة أفضل

اترك تعليقاً

لن يتم نشر عنوان بريدك الإلكتروني.